الجغرافيا هى العلم اللى بيدرس الارض و تضاريسها و سكانها و الظواهر الطبيعيه اللى بتحصل فيها. كلمة جغرافيا كلمه يونانيه (γεωγραφία) متكونه من مقطعين جيو يعنى ارض و جرافيا يعنى رسم او كتابه. اول واحد استعمل كلمة جغرافيا هوه ايراستوستينيس اليونانى اللى عاش فى اسكندريه بين (276-194 ق. م.) و مشهور بأنه اول واحد قدر يحسب محيط الكوره الارضيه. الجغرافيا بتتقسم لفرعين كبار هما: الجغرافيا البشريه و الجغرافيا الطبيعيه.

الجغرافيا البشريه بتدرس مواضيع زي البلاد و عدد السكان و الاقتصاد و الزراعه و الصناعه و الطاقه و التلوث.

الجغرافيا الطبيعيه بتهتم بمواضيع كتيره زى المناخ و التضاريس و القارات و البحور و الانهار و المحيطات و الجبال و الصخور.